يعني إيه ميديكال ريب؟

 كل حاجة هتحتاج تعرفها عن ميديكال ريب من أهل الخبرة

يعني إيه ميديكال ريب و إيه هي مرتبات الميديكال ريب في مصر؟

السؤال الأول:

يعني إيه ميديكال ريب أو يعني إيه مندوب مبيعات طبي؟
- الميديكال ريب هو الشخص المسؤول عن إيجاد علاقة مباشرة بين الدكتور و بين شركة الأدوية و بشكل غير مباشر مع المريض أو متلقي العلاج، لو جيت قريت مهام وظيفة الميديكال ريب هتلاقي إنه الشخص المسؤول عن بيع الأدوية بشكل غير مباشر و ده بيتم من خلال إقناع الطبيب بالدوا ده عن طريق:
- إجابة الاستفسارات الخاصة بالدكتور حول الدوا.
- شرح الدوا بشكل تفصيلي و مقنع للدكتور.
- تقديم خدمات للدكتور توفرله معلومات أكتر عن الدوا زي المؤتمرات مثلاً، ولو عاوز تقرا اكتر عن وصف وظيفة الميديكال ريب أضغط هنا 

 

 طيب جميل أنت كدة قولتيلنا تعريف الميديكال ريب، طب أحنا بيتقلنا إن الميديكال ريب ميفرقش بينه و بين البياع هل الكلام ده صح؟
الإجابة: لأ ثم لأ ثم لأ
ليه؟
الإجابة: اللي يقولك الميديكال ريب بياع يبقى هو مش فاهم الكلام اللي فوق زائد إنه مجربش يقارن بين البياع و الميديكال ريب و طبعاً المقارنة مش هعملهالك من كل النقط لكن تعالى نسأل نفسنا كام سؤال:
- هل البياع بيفهم المشتري البضاعة ويشرحهاله؟
- هل المشتري بيسأل البياع عن أضرار البضاعة أو مميزاتها؟
دول سؤالين صغيرين بس يفهموك أن الميديكال ريب حاجة أعمق و أكبر من مجرد انك تبيع و بس..

 

السؤال التاني:

إيه هي الكليات اللي ممكن تشتغل ميديكال ريب؟
الإجابة: الميديكال ريب هي وظيفة أساساً خاصة بالصيادلة و لكن من الممكن خريجي: علوم - طب - طب بيطري يشتغلوها..
لكن في الوقت الحالي شركات الأدوية بقت بتفضل خريج صيدلة عن أي كلية تانية و خصوصاً لو شركة ليها أسمها..

 

السؤال التالت:

أزاي أشتغل ميديكال ريب أو أزاي لو أنا طالب جامعة اتأهل أني اشتغل ميديكال ريب؟
الإجابة: هنقسم اجابتنا على جزئين جزء لو أنت طالب جامعة و جزء لو أنت حديث التخرج.
لو أنت طالب جامعة:
لازم تفهم نقطة مهمة جداً أن وظيفة الميديكال ريب فيها جانبين لازم تكون متفوق فيهم بشكل متساوي، الجانب المتعلق بمهاراتك و خصوصاً مهارات التواصل و التاني متعلق باهتمامك بالمادة العلمية.. و مقصدش بالمادة العلمية بدرجاتك في الجامعة لأ، أقصد بيها إزاي بتذاكر أو إزاي بتلم اللي وراك لأن ده هتعرف أهميته لما تتخرج..
طيب إيه المهارات اللي مهم جداً تكون عندك أو تكتسبها؟
- مهارات الكومبيوتر و خصوصاً ( Ms word - Ms Excel - Ms PowerPoint)
- مهارات التحدث بلباقة و أقناع الآخرين: و دي هي الأساس اللي نقدر نحطها تحت عنوان مهارات التواصل و اللي تقدر تطورها في الجامعة من خلال مشاركتك في أنشطة تطوعية أو في انشطة طلابية او حتى اي نشاط ترفيهي، المهم تتعود يبقى عندك ثقة في التعامل و التحدث مع الآخرين.

 

- مهارات تطوير الذات: بمعني تاني أتعلم تطور نفسك بنفسك متستناش حد يجي يزقك، طب و ده هيفدني قي إيه في الميديكال ريب؟ هيفيدك إنك تبقى قدام تترقى لأن ترقيتك هتحتاج تطوير منك كبير طب و أنت مالك متسربع ليه على الترقية؟ هقولك مش فكرة سربعة هي فكرة إنك تعود نفسك على أسلوب معين هيفيدك جداً قدام.
فيه واحد شايفه من بعيد و عمال بيشوح و بيقول ياعم طب انا بذاكر علشان اجيب تقدير و جايب امتياز و جيد جداً و كلام كتير كدة، بص التقدير مبيفرقش اطلاقاً في وظيفة الميديكال ريب ولا بيفرق في تفوقك فيها ولا هيفرق في أنك تدخل شركة قوية من شركة مش قوية الموضوع مش بيتقاس بالتقدير في الميديكال ريب، و طبعاً مش معني كلامي أنك متهتمش بمذاكرتك لكن لازم تفهم ان فيه حاجات تانية مهم تطورها و تشتغل عليها جمب ده..
طيب جميل لو أنا بقى حديث التخرج؟
- لو أنت حديث التخرج و عاوز تشتغل ميديكال ريب لازم تبص بقى على اللي فوق ده لو حاجة واقعة منك طورها و تاخد كورسات ليها علاقة بال Sales..
هتقولي ياعم انا عاوز اشتغل و بعدين ما ممكن اخد اي كورس في يومين: بص هو الموضوع مش فكرة تاخد كورس و تحطه ف ال CV الفكرة فكرة أنك تاخد كورس يعلمك أنت حاجات نظرية تشتغل على نفسك و تطبقها و تتدرب عليها و ده هيفرق معاك جداً في الانترفيو و هيعلمك تجاوب إزاي و تتكلم في انهي نقط و كدة..

 

قبل ما نكتبلكوا المقال ده خدنا رأي HR ميديكال ريب في إحدي الشركات اللي ليها إسم يعني في سوق الدوا و سألناه ازاي تعدي في اي انترفيو كميديال ريب و القبول معتمد على ايه؟
قال: "القبول في الميديكال ريب معتمد بنسبة ٧٠٪ على مهارات المتقدم للوظيفة من حيث (التواصل و ما يخصها من طريقة الكلام - اللغة - الكومبيوتر - مشاركته في انشطة ما) و ٣٠٪ اجابته على أسئلة الانترفيو.."
طيب هل كل الشركات ليها نفس المعايير؟
قال: ".. طبعاً لأ فيه شركات بيهمها اللغة أكتر من أى حاجة، فيه شركات بيهمها الإجابات على أسئلة الانترفيو و مش مهم كل المهارات تبقى متوافرة، فيه شركات يهمها شكل الميديكال ريب ولباقته أكتر من اجاباته في الانترفيو.."
بأختصار فهمنا منه ان ممكن شركة ترفضك مرة و تقدم تاني تتقبل و ممكن تتقبل في شركة غيرك يترفض فيها مع انه ممكن يكون متميز عنك في حاجات بس هو الموضوع نسب و أولويات..
طيب ايه الحل بقى؟ الحل هو انك تجتهد في كل النقاط دي و تشتغل على نفسك و تفكر دايماً أو تبص بعين الشركة و تشوف هما بيركزوا على ايه مهتمين بإيه وهكذا..

 

طيب نسأل بقى الأسئلة المهمة.. بيقبضوا كويس الميديكال ريب دول؟

الإجابة: لو مكانتش بتجيب فلوس مكنتش سمعت عنها ولا كنت بتقرا الكلام ده، إذن الإجابة طبعاً بيكسبوا كويس بس الاختلافات بتبقى طفيفة و متوسط المرتبات بيتراوح بين
٥٠٠٠ - ٧٠٠٠ جنيه فيه أعلى و فيه أقل..

 

طيب كان فيه سؤال بردو بيقول هو ليه شركات المالتي ناشونال بتدي مرتب أساسي اقل من الشركات المحلية؟
- الإجابة: لأن هما بيدوا Incentive أعلى بكتير من الشركات المحلية و ده بيعوض انخفاض المرتب الأساسي بالإضافة ان وجودك في شركة مالتي ناشونال هيضيفلك كتير و هيطورك أكتر و هيسهل عليك حاجات كتير هتعاني منها في الشركات المحلية و لكن، فيه بعض الشركات المحلية في مصر نظامها متطور و عندها Stability كبيرة كمثال مثلاً شركة Eva pharma أو Global Nabi أو Amoun شركات قوية و مرتباتها كويسة و فيها استقرار و بتبيع بمبالغ كبيرة جداً..
و بالتالي الموضوع ليه أبعاد أكتر من المرتب الشركة بتتقاس بحاجات تانية كتير..
طيب أخيراً هقولك كام نصيحة كتلخيص لكل الكلام اللي فات مهم جداً تفهمهم علشان توصلك الصورة بشكل كامل:
١- طوّر من نفسك في نواحي مختلفة متعلقة بمهارات التواصل و متهتمش بالمادة العلمية وبس.
٢- مظهرك مهم جداً.
٣- متبداش شغلك بحماس قد ما تبدأه بأنك تبني علاقات كويسة جوة شركتك لأن ده أهم حاجة.
٤- بعد ما تشتغل، متوقفش تطوير من نفسك.
٥- متبصش للمرتب قد ما تبص للأستقرار و المستقبل.
٦- أسأل أكتر من واحد شغال ف الشركة قبل ما تشتغل.
٧- ابني علاقة قوية مع الدكاترة اللي بتشتغل عليهم علشان ده جوهر نجاحك في الميديكال ريب.